Sakit sa Puso

Isang natatanging sakit sa aki’y dumapo
Maaaring magpatigil sa tibok ng aking puso
Anumang oras ay pwede akong maglaho
At hindi masasaksihan ang muling pag-ikot ng mundo.

Mahirap tanggapin ang pagkakaroon ng ganitong pait
Hindi pangkaraniwan ang nararamdamang sakit
Na parang ang puso’y laging pinipitpit
At ang hangin ay parang laging iniipit.

Maraming minamahal ang kailangang iwan
Isa na riyan ang mga tunay na kaibigan
Na sa hirap at ginhawa’y hindi ka iiwan
Maaasahan mo lagi sa oras ng pangangailangan.

Nariyan din ang pamilyang handing sumaklolo
Sa tuwing susumpungin nitong aking sakit sa puso
Pagmamahal at pag-asa ang iyong matatamo
Upang magtagal ang buhay ditto sa mundo.

Maiiwan ko din ang lalaking nagmamahal sa akin
Puso’t isipan ko’y siya lamang ang umaangkin
Sa lahat ng oras ako’y handing paligayahin
At hanggang sa kabilang buhay, siya pa rin ang iibigin.

Ako’y laging nagtatanong sa Poong Maykapal
Kung bakit ako pa ang Kanyang biniyayaan
Ng sakit na itong kayhirap lagpasan
Salamat, hindi Niya pa rin ako pinapabayaan.